usko mil kar dekh shayad wo tera aaina ho

us ko mil kar dekh shāyad vo tirā ā.īna ho

ġhā.ebāna hī tirī us kī shanāsā.ī na ho

mujh pe zāhir hai tire jī meñ haiñ kyā kyā ḳhvāhisheñ

baat aisī kar ki jis meñ terī rusvā.ī na ho

ehtiyātan dekhtā chal apne saa.e kī taraf

is tarah shāyad tujhe ehsās-e-tanhā.ī na ho

āsmāñ ik dasht kī sūrat sitāre ret haiñ

to lab-e-dariyā sarāboñ kā tamannā.ī na ho

DhūñDh ab kuchh bhāgte logoñ meñ sūrat āshnā

in bagūloñ meñ ga.e lamhoñ kī purvā.ī na ho

thā safar dar-pesh sahrā kā girah meñ rakh diye

us ne kuchh kāñTe ki uzr-e-ābla-pā.ī na ho

khīñch legā abr se bārish agar sabza huā

tū kisī kī chaah meñ be-kār saudā.ī na ho

ham use chhūkar yahī samjhe ki vo patthar nahīñ

is se baḌh kar aur kyā kahiye jo bīnā.ī na ho

khul ga.ī hai aañkh to chādar banā kar dekh le

tere kamre hī meñ in ḳhvāboñ kī ra.anā.ī na ho

zaḳhm tere dil kī zīnat haiñ unheñ parde meñ rakh

koī nā-mahram tire ghar kā tamāshā.ī na ho

aaj 'shāhid' us ke darvāze pe paañv ruk ga.e

radio bajtā thā maiñ chauñkā ki shahnā.ī na ho

us ko mil kar dekh shayad wo tera aaina ho

ghaebana hi teri us ki shanasai na ho

mujh pe zahir hai tere ji mein hain kya kya KHwahishen

baat aisi kar ki jis mein teri ruswai na ho

ehtiyatan dekhta chal apne sae ki taraf

is tarah shayad tujhe ehsas-e-tanhai na ho

aasman ek dasht ki surat sitare ret hain

to lab-e-dariya sarabon ka tamannai na ho

DhunDh ab kuchh bhagte logon mein surat aashna

in bagulon mein gae lamhon ki purwai na ho

tha safar dar-pesh sahra ka girah mein rakh diye

us ne kuchh kanTe ki uzr-e-abla-pai na ho

khinch lega abr se barish agar sabza hua

tu kisi ki chah mein be-kar saudai na ho

hum use chhukar yahi samjhe ki wo patthar nahin

is se baDh kar aur kya kahiye jo binai na ho

khul gai hai aankh to chadar bana kar dekh le

tere kamre hi mein in KHwabon ki ranai na ho

zaKHm tere dil ki zinat hain unhen parde mein rakh

koi na-mahram tere ghar ka tamashai na ho

aaj 'shahid' us ke darwaze pe panw ruk gae

radio bajta tha main chaunka ki shahnai na ho