usko mujhse rabt ulTa ruKH hai ye taswir ka

us ko mujh se rabt ulTā ruḳh hai ye tasvīr kā

ho na ho ye hai karishma aah kī tāsīr kā

mujh ko pahlū se uThānā thā to ḳhud uTh baiThtā

ek pahlū to nikal aatā mirī tauqīr kā

vaa.e qismat merī us kī dū-badū ho kar rahī

sāmne aa kar rahā likkhā mirī taqdīr kā

ik nazar se mujh ko raste par lagā kar chal diyā

maiñ ki phir dekhā kiyā rasta but-e-be-pīr kā

nāma-bar ke haath us ne saare ḳhat mañgvā liye

taar hai baaqī na koī bhī nishāñ tahrīr kā

chaar tinkoñ ko jalāne ke liye bechain thī

barq ko kab thā gavārā silsila tā'mīr kā

maiñ hī apnī saḳht-jānī pe huuñ nādim ai 'tamīz'

vaar to bharpūr thā go yaar kī shamshīr kā

us ko mujh se rabt ulTa ruKH hai ye taswir ka

ho na ho ye hai karishma aah ki tasir ka

mujh ko pahlu se uThana tha to KHud uTh baiThta

ek pahlu to nikal aata meri tauqir ka

wae qismat meri us ki du-badu ho kar rahi

samne aa kar raha likkha meri taqdir ka

ek nazar se mujh ko raste par laga kar chal diya

main ki phir dekha kiya rasta but-e-be-pir ka

nama-bar ke hath us ne sare KHat mangwa liye

tar hai baqi na koi bhi nishan tahrir ka

chaar tinkon ko jalane ke liye bechain thi

barq ko kab tha gawara silsila ta'mir ka

main hi apni saKHt-jaani pe hun nadim ai 'tamiz'

war to bharpur tha go yar ki shamshir ka