usko mujhse ruTha diya kis ne

us ko mujh se ruThā diyā kis ne

mere dil ko dukhā diyā kis ne

dām-e-kākul dikhā diyā kis ne

murġh-e-dil ko phañsā diyā kis ne

ḳham-e-abru dikhā diyā kis ne

ka.aba-e-dil girā diyā kis ne

ai falak ham to baiThe hañste the

uThte uThte rulā diyā kis ne

aa.ine meñ dikhā ke terī shakl

tujh ko hairāñ banā diyā kis ne

ik qalam harf-e-dostī bhūlā

haa.e us ko paḌhā diyā kis ne

maiñ gayā us ke ghar to kahne lagā

ghar hamārā batā diyā kis ne

nahīñ ma.alūm shauq-e-qatl meñ kuchh

sar hamārā uḌā diyā kis ne

na samā.e kisī kī āñkhoñ meñ

nazroñ se yuuñ girā diyā kis ne

māñgte hī gunāhgār hue

us se bosa liyā diyā kis ne

kal talak dost thā vo 'goyā' kā

aaj dushman banā diyā kis ne

us ko mujh se ruTha diya kis ne

mere dil ko dukha diya kis ne

dam-e-kakul dikha diya kis ne

murgh-e-dil ko phansa diya kis ne

KHam-e-abru dikha diya kis ne

kaba-e-dil gira diya kis ne

ai falak hum to baiThe hanste the

uThte uThte rula diya kis ne

aaine mein dikha ke teri shakl

tujh ko hairan bana diya kis ne

ek qalam harf-e-dosti bhula

hae us ko paDha diya kis ne

main gaya us ke ghar to kahne laga

ghar hamara bata diya kis ne

nahin malum shauq-e-qatl mein kuchh

sar hamara uDa diya kis ne

na samae kisi ki aankhon mein

nazron se yun gira diya kis ne

mangte hi gunahgar hue

us se bosa liya diya kis ne

kal talak dost tha wo 'goya' ka

aaj dushman bana diya kis ne