usko naghmon mein sameTun to buka jaane hai

us ko naġhmoñ meñ sameTūñ to bukā jaane hai

girya-e-shab ko jo naġhme kī sadā jaane hai

maiñ tirī āñkhoñ meñ apne liye kyā kyā DhūñDūñ

tū mire dard ko kuchh mujh se sivā jaane hai

us ko rahne do mire zaḳhmoñ kā marham ban kar

ḳhūn-e-dil ko jo mire rañg-e-hinā jaane hai

merī mahrūmī-e-furqat se use kyā lenā

vo to aahoñ ko bhī mānind-e-sabā jaane hai

ek hī din meñ tire shahr kī masmūm fazā

mere pairahan-e-sāda ko riyā jaane hai

maiñ kabhī tere darīche meñ khilā phuul bhī thā

aaj kyā huuñ tire gulshan kī havā jaane hai

mujh se kahtā hai mirā shoḳh ki iqbāl-'matīn'

tum rahe raat kahāñ ye to ḳhudā jaane hai

us ko naghmon mein sameTun to buka jaane hai

girya-e-shab ko jo naghme ki sada jaane hai

main teri aankhon mein apne liye kya kya DhunDun

tu mere dard ko kuchh mujh se siwa jaane hai

us ko rahne do mere zaKHmon ka marham ban kar

KHun-e-dil ko jo mere rang-e-hina jaane hai

meri mahrumi-e-furqat se use kya lena

wo to aahon ko bhi manind-e-saba jaane hai

ek hi din mein tere shahr ki masmum faza

mere pairahan-e-sada ko riya jaane hai

main kabhi tere dariche mein khila phul bhi tha

aaj kya hun tere gulshan ki hawa jaane hai

mujh se kahta hai mera shoKH ki iqbaal-'matin'

tum rahe raat kahan ye to KHuda jaane hai