usko nazrana-e-jaan pesh kiya hai maine

us ko nazrāna-e-jāñ pesh kiyā hai maiñ ne

yuuñ subūt apnī vafāoñ kā diyā hai maiñ ne

ai mire dāman-e-sad-chāk pe hañsne vaale

yaad kar terā garebāñ bhī siyā hai maiñ ne

ḳhud-kushī kī mire dil ne mujhe dī hai tarġhīb

jab kisī ġhair kā ehsān liyā hai maiñ ne

ġhairat-e-ishq ko pāmāl na hone dūñgā

zindagī tujh se yahī ahd kiyā hai maiñ ne

ai mirī ḳhāk-e-vatan tujh se maiñ sharminda nahīñ

bārhā apnā lahū tujh ko diyā hai maiñ ne

yuuñ to marne ke liye zahr piyā jaatā hai

zindagī tere liye zahr piyā hai maiñ ne

zindagī mujh se bachāne lagī dāman 'anjum'

jab ġham-e-dil ko farāmosh kiyā hai maiñ ne

us ko nazrana-e-jaan pesh kiya hai main ne

yun subut apni wafaon ka diya hai main ne

ai mere daman-e-sad-chaak pe hansne wale

yaad kar tera gareban bhi siya hai main ne

KHud-kushi ki mere dil ne mujhe di hai targhib

jab kisi ghair ka ehsan liya hai main ne

ghairat-e-ishq ko pamal na hone dunga

zindagi tujh se yahi ahd kiya hai main ne

ai meri KHak-e-watan tujh se main sharminda nahin

barha apna lahu tujh ko diya hai main ne

yun to marne ke liye zahr piya jata hai

zindagi tere liye zahr piya hai main ne

zindagi mujh se bachane lagi daman 'anjum'

jab gham-e-dil ko faramosh kiya hai main ne