us lab ki KHamushi ke sabab TuTta hun main

us lab kī ḳhāmushī ke sabab TūTtā huuñ maiñ

dast-e-duā meñ rakkhā huā aa.ina huuñ maiñ

ab jā ke ho sakegī mohabbat vasūq se

ḳhud se bichhaḌte vaqt kisī se milā huuñ maiñ

ābād hai ḳhazāne kī afvāh se vajūd

matrūk jañgaloñ kā koī rāsta huuñ maiñ

dastār kāġhzī hai fazīlat hai naam kī

chhoToñ kī mehrbānī se ghar meñ baḌā huuñ maiñ

ro kar na soyā jaa.e to kyā niiñd kā javāz

bistar kī har shikan meñ paḌā jāgtā huuñ maiñ

huuñ apnī raushnī kī aziyyat meñ mubtalā

jaltā huā charāġh huuñ ulTā paḌā huuñ maiñ

us lab ki KHamushi ke sabab TuTta hun main

dast-e-dua mein rakkha hua aaina hun main

ab ja ke ho sakegi mohabbat wasuq se

KHud se bichhaDte waqt kisi se mila hun main

aabaad hai KHazane ki afwah se wajud

matruk jangalon ka koi rasta hun main

dastar kaghzi hai fazilat hai nam ki

chhoTon ki mehrbani se ghar mein baDa hun main

ro kar na soya jae to kya nind ka jawaz

bistar ki har shikan mein paDa jagta hun main

hun apni raushni ki aziyyat mein mubtala

jalta hua charagh hun ulTa paDa hun main