us masihai ke sadqe kaam-e-jaan tak aa gai

us masīhā.ī ke sadqe kām-e-jāñ tak aa ga.ī

tajribe karte hue naubat yahāñ tak aa ga.ī

ab to gahvāroñ pe ḳhādim rakh liye māñ-bāp ne

māmtā taḳhmīna-e-sūd-o-ziyāñ tak aa ga.ī

tū ne koshish to yahī ki thī ki ghar merā jale

aag jab bhaḌkī to phir tere makāñ tak aa ga.ī

is nizām-e-āb-o-gil meñ zahr phailāne ke ba.ad

phir vahī shorish zamīñ se āsmāñ tak aa ga.ī

mujh meñ aur duniyā meñ phir kyā farq hogā dosto

zindagī kī hai jo talḳhī gar zabāñ tak aa ga.ī

itnī qurbat thī hamārī apne tīr-andāz se

dhaar ḳhuuñ kī jism se niklī kamāñ tak aa ga.ī

band ye apne tashaḳhḳhus kā na bah jaa.e kahīñ

mauj-e-sail-e-tund ḳhatre ke nishāñ tak aa ga.ī

us masihai ke sadqe kaam-e-jaan tak aa gai

tajribe karte hue naubat yahan tak aa gai

ab to gahwaron pe KHadim rakh liye man-bap ne

mamta taKHmina-e-sud-o-ziyan tak aa gai

tu ne koshish to yahi ki thi ki ghar mera jale

aag jab bhaDki to phir tere makan tak aa gai

is nizam-e-ab-o-gil mein zahr phailane ke baad

phir wahi shorish zamin se aasman tak aa gai

mujh mein aur duniya mein phir kya farq hoga dosto

zindagi ki hai jo talKHi gar zaban tak aa gai

itni qurbat thi hamari apne tir-andaz se

dhaar KHun ki jism se nikli kaman tak aa gai

band ye apne tashaKHKHus ka na bah jae kahin

mauj-e-sail-e-tund KHatre ke nishan tak aa gai