usne ghairon ki tarah meri pazirai ki

us ne ġhairoñ kī tarah merī pazīrā.ī kī

baat to sach hai magar baat hai rusvā.ī kī

ḳhvāb thā yā ki sarāb aah hujūm-e-guzarāñ

fikr hai ab to sharīk-e-ġham-e-tanhā.ī kī

ḳhūn-e-dil ko shab-e-tārīk meñ raushan kar ke

ham ne tā-umr yuuñ hī anjuman-ārā.ī kī

tez-tar hotī ga.ī firqa-parastī kī havā

dhajjiyāñ ḳhuub uḌaa.ī ga.iiñ yaktā.ī kī

mas.ale kitne bhī uljhe hoñ sulajh sakte haiñ

band kamroñ meñ jo bāteñ na hoñ dānā.ī kī

us ne ghairon ki tarah meri pazirai ki

baat to sach hai magar baat hai ruswai ki

KHwab tha ya ki sarab aah hujum-e-guzaran

fikr hai ab to sharik-e-gham-e-tanhai ki

KHun-e-dil ko shab-e-tarik mein raushan kar ke

hum ne ta-umr yun hi anjuman-arai ki

tez-tar hoti gai firqa-parasti ki hawa

dhajjiyan KHub uDai gain yaktai ki

masale kitne bhi uljhe hon sulajh sakte hain

band kamron mein jo baaten na hon danai ki