usne haal-e-dil-e-nashad na dekha na suna

us ne hāl-e-dil-e-nāshād na dekhā na sunā

aisā zālim sitam-ījād na dekhā na sunā

bol uThe dekh ke vo ḳhāna-e-vīrāñ merā

koī aisā to ġham-ābād na dekhā na sunā

tere bismil ko taḌapne kī ijāzat bhī nahīñ

maiñ ne tujh sā koī jallād na dekhā na sunā

aap kā bhī hai ajab haal ġhalat kah uTThe

aap ne qissa-e-farhād na dekhā na sunā

maiñ jahāñ jaatā huuñ nāseh bhī pahuñchtā hai vahīñ

is tarah kā koī ham-zād na dekhā na sunā

mausam-e-gul meñ chhuḌāyā hai chaman bulbul se

zulm is tarah kā sayyād na dekhā na sunā

be-gunā lākhoñ hī maqtal meñ hue haa.e shahīd

tū ne kuchh bānī-e-be-dād na dekhā na sunā

jhuuT sach jo tirā jī chāhe kahe jā vaa.iz

maiñ ne hāl-e-adam-ābād na dekhā na sunā

ḳhāna-e-dil mirā vīrān hai jaisā aisā

dūsrā ḳhāna-e-barbād na dekhā na sunā

maiñ to andhā thā mohabbat meñ kisī kī lekin

tū ne bhī ai dil-e-nāshād na dekhā na sunā

hāl-e-dil us ko sunāyā hai 'fahīm' āḳhir-kār

maiñ ne tujh sā koī ustād na dekhā na sunā

us ne haal-e-dil-e-nashad na dekha na suna

aisa zalim sitam-ijad na dekha na suna

bol uThe dekh ke wo KHana-e-viran mera

koi aisa to gham-abaad na dekha na suna

tere bismil ko taDapne ki ijazat bhi nahin

main ne tujh sa koi jallad na dekha na suna

aap ka bhi hai ajab haal ghalat kah uTThe

aap ne qissa-e-farhad na dekha na suna

main jahan jata hun naseh bhi pahunchta hai wahin

is tarah ka koi ham-zad na dekha na suna

mausam-e-gul mein chhuDaya hai chaman bulbul se

zulm is tarah ka sayyaad na dekha na suna

be-guna lakhon hi maqtal mein hue hae shahid

tu ne kuchh bani-e-be-dad na dekha na suna

jhuT sach jo tera ji chahe kahe ja waiz

main ne haal-e-adam-abaad na dekha na suna

KHana-e-dil mera viran hai jaisa aisa

dusra KHana-e-barbaad na dekha na suna

main to andha tha mohabbat mein kisi ki lekin

tu ne bhi ai dil-e-nashad na dekha na suna

haal-e-dil us ko sunaya hai 'fahim' aaKHir-kar

main ne tujh sa koi ustad na dekha na suna