اس نے جب ترک محبت کی وضاحت نہیں دی

اس نے جب ترک محبت کی وضاحت نہیں دی

ہم نے بھی پوچھ کے اس شخص کو زحمت نہیں دی

آنکھ سہتی رہی اک درد کے منظر کی چبھن

دل وہ صابر تھا کہ رونے کی اجازت نہیں دی

منتظر در پہ نہ تھا کوئی تو پھر ہم نے بھی

بند دروازے کو دستک کی اذیت نہیں دی

یہ تہی دستی ملی عشق میں محنت کے عوض

اس مہاجن نے بھی مزدور کو اجرت نہیں دی

رات تو کٹ گئی اک درد کے ہنگاموں میں

شکوہ یہ ہے کہ ہمیں صبح نے راحت نہیں دی

سر پہ رکھا گیا اک بار مشقت اک عمر

اتنی آسانی سے قدموں تلے جنت نہیں دی