اس نے جو عشق وشق کے ہجے الگ نہیں کیے

اس نے جو عشق وشق کے ہجے الگ نہیں کیے

ہم نے بھی درد سہہ لیے صدمے الگ نہیں کیے

میرے اور اس کے درمیاں رشتہ وبال جان تھا

دل کو سرہانے رکھ دیا کمرے الگ نہیں کیے

اس نے کسی کی چاہ میں چاہ کو میری ڈس لیا

سوچا تو میں نے بارہا رستے الگ نہیں کیے

گھر کے ہر اک مقام پر سہمی کھڑی تھیں الفتیں

کمروں سے اس کی یاد کے جالے الگ نہیں کیے

دونوں ہم اک کلاس کے لڑتے تھے زور و شور سے

روٹھنا اور بات تھی بستے الگ نہیں کیے

دل سے اسے لگا لیا ایسا سکوں ملا کہ بس

روتی رہی میں دیر تک کاندھے الگ نہیں کیے

بیٹوں نے رخ بدل لیا چھوڑ کے اس کو چل دئے

باپ نے جسم ہار کے رشتے الگ نہیں کیے

لہجوں کی ساری برہمی سیتی رہی تمام عمر

میں نے کتاب زیست سے بخیے الگ نہیں کیے