usne jo ishq-wishq ke hijje alag nahin kiye

us ne jo ishq-vishq ke hijje alag nahīñ kiye

ham ne bhī dard sah liye sadme alag nahīñ kiye

mere aur us ke darmiyāñ rishta vabāl-e-jān thā

dil ko sirhāne rakh diyā kamre alag nahīñ kiye

us ne kisī kī chaah meñ chaah ko merī Das liyā

sochā to maiñ ne bārhā raste alag nahīñ kiye

ghar ke har ik maqām par sahmī khaḌī thiiñ ulfateñ

kamroñ se us kī yaad ke jaale alag nahīñ kiye

donoñ ham ik class ke laḌte the zor-o-shor se

rūThnā aur baat thī baste alag nahīñ kiye

dil se use lagā liyā aisā sukūñ milā ki bas

rotī rahī maiñ der tak kāñdhe alag nahīñ kiye

beToñ ne ruḳh badal liyā chhoḌ ke us ko chal diye

baap ne jism haar ke rishte alag nahīñ kiye

lahjoñ kī saarī barhamī siitī rahī tamām umr

maiñ ne kitāb-e-zīst se baḳhiye alag nahīñ kiye

us ne jo ishq-wishq ke hijje alag nahin kiye

hum ne bhi dard sah liye sadme alag nahin kiye

mere aur us ke darmiyan rishta wabaal-e-jaan tha

dil ko sirhane rakh diya kamre alag nahin kiye

us ne kisi ki chah mein chah ko meri Das liya

socha to main ne barha raste alag nahin kiye

ghar ke har ek maqam par sahmi khaDi thin ulfaten

kamron se us ki yaad ke jale alag nahin kiye

donon hum ek class ke laDte the zor-o-shor se

ruThna aur baat thi baste alag nahin kiye

dil se use laga liya aisa sukun mila ki bas

roti rahi main der tak kandhe alag nahin kiye

beTon ne ruKH badal liya chhoD ke us ko chal diye

bap ne jism haar ke rishte alag nahin kiye

lahjon ki sari barhami siti rahi tamam umr

main ne kitab-e-zist se baKHiye alag nahin kiye