اس نے یوں ہی تو سر راہ نہ ٹوکا ہوگا

اس نے یوں ہی تو سر راہ نہ ٹوکا ہوگا

میرا ہم شکل کوئی اس کا شناسا ہوگا

سر پہ سائے کی جگہ دھوپ کا صحرا ہوگا

سوچ لو یہ بھی ذرا راستہ لمبا ہوگا

قہر موسم نے وہ توڑے ہیں کہ جنگل جنگل

اب کسی پیڑ میں پھل پھول نہ پتا ہوگا

گرد چہرے پہ جمے یا جمے آئینے پر

عکس ہر حال میں دیکھو گے تو دھندلا ہوگا

آئنے پھوٹ کے روتے ہیں تو کہتے ہیں سنو

ہم سے اب بھاگتے لمحوں کا نہ پیچھا ہوگا

جگمگا جائے گا کچھ اور ترا شہر بدن

جابجا لمس کا جب اس میں تماشا ہوگا