us par bhi dushmanon ka kahin saya paD gaya

us par bhī dushmanoñ kā kahīñ saaya paḌ gayā

ġham sā purānā dost bhī āḳhir bichhaḌ gayā

jī chāhtā to baiThte yādoñ kī chhāñv meñ

aisā ghanā daraḳht bhī jaḌ se ukhaḌ gayā

ġhairoñ ne mujh ko dafn kiyā shāh-rāh par

maiñ kyuuñ na apnī ḳhaak meñ ġhairat se gaḌ gayā

ḳhalvat meñ jis kī narm-mizājī thī be-misāl

mahfil meñ be-sabab vahī mujh se akaḌ gayā

bas itnī baat thī ki ayādat ko aa.e log

dil ke har ek zaḳhm kā Tāñkā udhaḌ gayā

kis kis ko apne ḳhūn-e-jigar kā hisāb duuñ

ik qatra bach rahā hai so vo bhī nibaḌ gayā

yāroñ ne ḳhuub jā ke zamāne se sulh kī

maiñ aisā bad-dimāġh yahāñ bhī bichhaḌ gayā

kotāhiyoñ kī apnī maiñ tāvīl kyā karūñ

merā har ek khel mujhī se bigaḌ gayā

ab kyā batā.eñ kyā thā ḳhayāloñ ke shahr meñ

basne se pahle vaqt ke hāthoñ ujaḌ gayā

us par bhi dushmanon ka kahin saya paD gaya

gham sa purana dost bhi aaKHir bichhaD gaya

ji chahta to baiThte yaadon ki chhanw mein

aisa ghana daraKHt bhi jaD se ukhaD gaya

ghairon ne mujh ko dafn kiya shah-rah par

main kyun na apni KHak mein ghairat se gaD gaya

KHalwat mein jis ki narm-mizaji thi be-misal

mahfil mein be-sabab wahi mujh se akaD gaya

bas itni baat thi ki ayaadat ko aae log

dil ke har ek zaKHm ka Tanka udhaD gaya

kis kis ko apne KHun-e-jigar ka hisab dun

ek qatra bach raha hai so wo bhi nibaD gaya

yaron ne KHub ja ke zamane se sulh ki

main aisa bad-dimagh yahan bhi bichhaD gaya

kotahiyon ki apni main tawil kya karun

mera har ek khel mujhi se bigaD gaya

ab kya bataen kya tha KHayalon ke shahr mein

basne se pahle waqt ke hathon ujaD gaya