us pari-paikar ki aankhon mein jhalak rah jaegi

us parī-paikar kī āñkhoñ meñ jhalak rah jā.egī

vo chalī jā.egī to ḳhālī saḌak rah jā.egī

phuul us kī yaad ke rakkhe hue haiñ mez par

ye agar murjhā ga.e in kī mahak rah jā.egī

vo kalā.ī to phisal jā.egī hāthoñ se magar

chūḌiyoñ kī mere kānoñ meñ khanak rah jā.egī

ek din vo naqsh bhī dhuñdle se paḌte jā.eñge

zehn meñ vo shakl bhī tasvīr tak rah jā.egī

phir koī tālāb meñ pheñkegā patthar zor se

phir kisī shai kī darūn-e-dil kasak rah jā.egī

lauT jā.egā koī dar ko muqaffal dekh kar

aur darvāze pe kunDī kī khaTak rah jā.egī

phir ghaḌī kī suuī bhī ruk jā.egī us ke baġhair

sirf dil meñ us ke qadmoñ kī dhamak rah jā.egī

dhuup Dhal jā.egī vaqt-e-shām hote hī 'zahūr'

aur chamkīle se chehroñ kī chamak rah jā.egī

us pari-paikar ki aankhon mein jhalak rah jaegi

wo chali jaegi to KHali saDak rah jaegi

phul us ki yaad ke rakkhe hue hain mez par

ye agar murjha gae in ki mahak rah jaegi

wo kalai to phisal jaegi hathon se magar

chuDiyon ki mere kanon mein khanak rah jaegi

ek din wo naqsh bhi dhundle se paDte jaenge

zehn mein wo shakl bhi taswir tak rah jaegi

phir koi talab mein phenkega patthar zor se

phir kisi shai ki darun-e-dil kasak rah jaegi

lauT jaega koi dar ko muqaffal dekh kar

aur darwaze pe kunDi ki khaTak rah jaegi

phir ghaDi ki sui bhi ruk jaegi us ke baghair

sirf dil mein us ke qadmon ki dhamak rah jaegi

dhup Dhal jaegi waqt-e-sham hote hi 'zahur'

aur chamkile se chehron ki chamak rah jaegi