us rashk-e-mah ki yaad dilati hai chandni

us rashk-e-mah kī yaad dilātī hai chāndnī

har raat mujh ko aa ke satātī hai chāndnī

āb-e-ravāñ meñ husn milātī hai chāndnī

har mauj meñ ghaTī nazar aatī hai chāndnī

jā baiThte haiñ ham lab-e-dariyā pe jab kabhū

kyā jhumke apne ham ko dikhātī hai chāndnī

sāmān-e-bazm-e-bāda maiñ kartā huuñ jis ghaḌī

aa chāndnī kā farsh bichhātī hai chāndnī

sahrā meñ jā ke dekh ki har rūd-e-ḳhushk ko

ham rañg-e-jū-e-shīr banātī hai chāndnī

jab dekhtī hai duudh sā pinDā tirā miyāñ

ḳhajlat se aab hī huī jaatī hai chāndnī

pyāre añdherī rāteñ haiñ aise meñ mil le tū

phir varna chāñd chaḌhte hī aatī hai chāndnī

gar vo bhī qadr-dāñ ho to be-jazba-e-talab

rūThe hue sanam ko milātī hai chāndnī

kyūñkar na maiñ jalūñ shab-e-hijrāñ meñ 'mus.hafī'

bin yaar mere jī ko jalātī hai chāndnī

us rashk-e-mah ki yaad dilati hai chandni

har raat mujh ko aa ke satati hai chandni

aab-e-rawan mein husn milati hai chandni

har mauj mein ghaTi nazar aati hai chandni

ja baiThte hain hum lab-e-dariya pe jab kabhu

kya jhumke apne hum ko dikhati hai chandni

saman-e-bazm-e-baada main karta hun jis ghaDi

aa chandni ka farsh bichhati hai chandni

sahra mein ja ke dekh ki har rud-e-KHushk ko

hum rang-e-ju-e-shir banati hai chandni

jab dekhti hai dudh sa pinDa tera miyan

KHajlat se aab hi hui jati hai chandni

pyare andheri raaten hain aise mein mil le tu

phir warna chand chaDhte hi aati hai chandni

gar wo bhi qadr-dan ho to be-jazba-e-talab

ruThe hue sanam ko milati hai chandni

kyunkar na main jalun shab-e-hijran mein 'mushafi'

bin yar mere ji ko jalati hai chandni