us sang-dil ke dil mein mohabbat ne ghar kiya

us sang-dil ke dil meñ mohabbat ne ghar kiyā

muddat ke baad aah ne apnī asar kiyā

teġh-e-nigah ke sāmne siina sipar kiyā

kab ham ne apnī jaan kā ḳhauf-o-ḳhatar kiyā

sābit karo ḳhatā mirī phir apnā muñh chhupāo

kis raat ko nazāra-e-rū-e-qamar kiyā

sayyād kā ye zulm na bhūlūñgā umr bhar

fasl-e-bahār aate hī be-bāl-o-par kiyā

lo apne ghar vo sub.h se pahle hī jaate haiñ

andher kyā ye nāla-e-murġh-e-sahar kiyā

chauñke sadā-e-sūr-e-sarāfīl se na ham

saaqī tirī nigāh ne ye be-ḳhabar kiyā

kāTūñgā is adā pe gila apne haath se

qātil ne aaj nīmcha zeb-e-kamar kiyā

ruḳhsat kā naam sunte hī bas dam nikal gayā

jaane se un ke pahle hī ham ne safar kiyā

kyā kyā kiyā na aap kī ulfat ne mere saath

rusvā kiyā ḳharāb kiyā dar-ba-dar kiyā

'vahbī' phir un ke vasl ko tarsoge umr bhar

naala shab-e-firāq meñ tum ne agar kiyā

us sang-dil ke dil mein mohabbat ne ghar kiya

muddat ke baad aah ne apni asar kiya

tegh-e-nigah ke samne sina sipar kiya

kab hum ne apni jaan ka KHauf-o-KHatar kiya

sabit karo KHata meri phir apna munh chhupao

kis raat ko nazara-e-ru-e-qamar kiya

sayyaad ka ye zulm na bhulunga umr bhar

fasl-e-bahaar aate hi be-baal-o-par kiya

lo apne ghar wo subh se pahle hi jate hain

andher kya ye nala-e-murgh-e-sahar kiya

chaunke sada-e-sur-e-sarafil se na hum

saqi teri nigah ne ye be-KHabar kiya

kaTunga is ada pe gila apne hath se

qatil ne aaj nimcha zeb-e-kamar kiya

ruKHsat ka nam sunte hi bas dam nikal gaya

jaane se un ke pahle hi hum ne safar kiya

kya kya kiya na aap ki ulfat ne mere sath

ruswa kiya KHarab kiya dar-ba-dar kiya

'wahbi' phir un ke wasl ko tarsoge umr bhar

nala shab-e-firaq mein tum ne agar kiya