us se baaton mein na uljha kijiye

us se bātoñ meñ na uljhā kījiye

kyoñ kisī aafat kā saudā kījiye

dafn haiñ sachchā.iyāñ chāroñ taraf

aap ḳhāmoshī se niklā kījiye

guzre lamhoñ se bhī miltā hai sabaq

yād-e-māzī ko TaTolā kījiye

kitnā gahrā hai samundar dekhiye

aur phir dāman bhigoyā kījiye

jo gunāh ke rāstoñ par chal paḌe

us ko rāh-e-haq dikhāyā kījiye

hai tire mahbūb kī mehñdī kā rang

is ko āñkhoñ se lagāyā kījiye

kar ke chehre par raqam sachchā.iyāñ

aa.ina phir aap dekhā kījiye

roz mil kar bhī nahīñ pahchānte

āshnā.ī kā na da.avā kījiye

lab pe ho shukr-e-ḳhudā har haal meñ

zindagī ko yuuñ guzārā kījiye

aap se jo TuuT kar miltā na ho

us se milne kī tamanna kījiye

gungunā kar aap ye merī ġhazal

ek shā.ir ko na rusvā kījiye

ḳhauf hai jo tund jhoñkoñ kā 'sa.īd'

mat charāġhoñ ko jalāyā kījiye

us se baaton mein na uljha kijiye

kyon kisi aafat ka sauda kijiye

dafn hain sachchaiyan chaaron taraf

aap KHamoshi se nikla kijiye

guzre lamhon se bhi milta hai sabaq

yaad-e-mazi ko TaTola kijiye

kitna gahra hai samundar dekhiye

aur phir daman bhigoya kijiye

jo gunah ke raston par chal paDe

us ko rah-e-haq dikhaya kijiye

hai tere mahbub ki mehndi ka rang

is ko aankhon se lagaya kijiye

kar ke chehre par raqam sachchaiyan

aaina phir aap dekha kijiye

roz mil kar bhi nahin pahchante

aashnai ka na dawa kijiye

lab pe ho shukr-e-KHuda har haal mein

zindagi ko yun guzara kijiye

aap se jo TuT kar milta na ho

us se milne ki tamanna kijiye

gunguna kar aap ye meri ghazal

ek shair ko na ruswa kijiye

KHauf hai jo tund jhonkon ka 'said'

mat charaghon ko jalaya kijiye