اس سے کہوں میں حال دل داغ داغ کیا

اس سے کہوں میں حال دل داغ داغ کیا

ہنس کر جو یہ کہے کہ سجایا ہے باغ کیا

قبر ایک خوش نصیب کی پھولوں سے اٹ گئی

یاروں کے آنسوؤں نے جلائے چراغ کیا

وہ ملتفت نہیں ہیں تو کیا لطف مے کشی

اب ہیں نظر میں ہیچ سبو کیا ایاغ کیا

وہ مہرباں نہ ہوں تو خوشی کا کسے دماغ

دل مطمئن نہ ہو تو غم سیر باغ کیا

شبنم کے گریہ سے مرا پہنچا کہاں خیال

غنچہ ہے سینۂ چمنستاں کا داغ کیا

فطرتؔ مزاج شعر کی گرمی نہ پوچھئے

دو شعر کہہ کے جلنے لگا ہے دماغ کیا