us se kya chhup sake banai baat

us se kyā chhup sake banā.ī baat

taaḌ jaa.e jo dil kī aa.ī baat

kahiye guzrī hai ek saañ kis kī

kabhī bigḌī kabhī ban aa.ī baat

rahe dil meñ to hai vo baat apnī

muñh se niklī huī parā.ī baat

maiñ samajhtā huuñ ye na.ī chāleñ

kabhī chhuptī nahīñ sikhā.ī baat

kah diyā apne dil ko ḳhud be-rahm

chhīn lī mere muñh kī aa.ī baat

rakh liyā āshiqoñ ne nām-e-vafā

ga.ī jaañ par na jaane paa.ī baat

rañg bigḌā hai un kī sohbat kā

ab nahīñ hai vo ibtidā.ī baat

mujh se be-vaj.h hote ho bad-zan

kar ke bāvar sunī-sunā.ī baat

kyā ho un kā mizāj-dāñ koī

rūThnā khel hai laḌā.ī baat

ġhair kā zikr gar na thā sāhab

mere aate hī kyuuñ uḌaa.ī baat

dil meñ rakhtā hai ḳhuub sun ke 'habīb'

chāhe apnī ho yā parā.ī baat

us se kya chhup sake banai baat

taD jae jo dil ki aai baat

kahiye guzri hai ek san kis ki

kabhi bigDi kabhi ban aai baat

rahe dil mein to hai wo baat apni

munh se nikli hui parai baat

main samajhta hun ye nai chaalen

kabhi chhupti nahin sikhai baat

kah diya apne dil ko KHud be-rahm

chhin li mere munh ki aai baat

rakh liya aashiqon ne nam-e-wafa

gai jaan par na jaane pai baat

rang bigDa hai un ki sohbat ka

ab nahin hai wo ibtidai baat

mujh se be-wajh hote ho bad-zan

kar ke bawar suni-sunai baat

kya ho un ka mizaj-dan koi

ruThna khel hai laDai baat

ghair ka zikr gar na tha sahab

mere aate hi kyun uDai baat

dil mein rakhta hai KHub sun ke 'habib'

chahe apni ho ya parai baat