us se mera to koi dur ka rishta bhi nahin

us se merā to koī duur kā rishta bhī nahīñ

aur ye bhī hai ki vo shaḳhs parāyā bhī nahīñ

vo mire ġham se ho anjān kuchh aisā bhī nahīñ

vo mirā haal magar pūchhne aayā bhī nahīñ

ġhair ko qurb mayassar hai magar ai hamdam

merī ḳhātir to tirā duur kā jalva bhī nahīñ

umr bhar saath nibhāne kā karūñ kyā va.ada

zindagī ab to mujhe ḳhud pe bharosa bhī nahīñ

is qadar mujh ko rahā ābrū-e-ġham kā ḳhayāl

ronā chāhā to magar phuuT ke royā bhī nahīñ

ek terī jo tamannā na rahī ai hamdam

mere dil meñ to kisī shai kī tamannā bhī nahīñ

ek vo haiñ ki unheñ aa.ī hai ārām kī niiñd

ek maiñ huuñ ki kabhī chain se soyā bhī nahīñ

baaz aate bhī nahīñ zulm-o-sitam se apne

dekh paate ho magar merā taḌapnā bhī nahīñ

chhoḌe jaatī hai magar ye bhī tujhe yaad rahe

zindagī tere sivā ab koī apnā bhī nahīñ

kis tarah phail ga.ī bū-e-hinā har jānib

us ke baare meñ abhī maiñ ne to sochā bhī nahīñ

mujh ko hālāt ne behis hī banā kar chhoḌā

mere siine meñ ye dil hai ki dhaḌaktā bhī nahīñ

bhuul ke saare sitam ham to chale jaate 'zafar'

par hameñ us ne kabhī dil se bulāyā bhī nahīñ

us se mera to koi dur ka rishta bhi nahin

aur ye bhi hai ki wo shaKHs paraya bhi nahin

wo mere gham se ho anjaan kuchh aisa bhi nahin

wo mera haal magar puchhne aaya bhi nahin

ghair ko qurb mayassar hai magar ai hamdam

meri KHatir to tera dur ka jalwa bhi nahin

umr bhar sath nibhane ka karun kya wada

zindagi ab to mujhe KHud pe bharosa bhi nahin

is qadar mujh ko raha aabru-e-gham ka KHayal

rona chaha to magar phuT ke roya bhi nahin

ek teri jo tamanna na rahi ai hamdam

mere dil mein to kisi shai ki tamanna bhi nahin

ek wo hain ki unhen aai hai aaram ki nind

ek main hun ki kabhi chain se soya bhi nahin

baz aate bhi nahin zulm-o-sitam se apne

dekh pate ho magar mera taDapna bhi nahin

chhoDe jati hai magar ye bhi tujhe yaad rahe

zindagi tere siwa ab koi apna bhi nahin

kis tarah phail gai bu-e-hina har jaanib

us ke bare mein abhi main ne to socha bhi nahin

mujh ko haalat ne behis hi bana kar chhoDa

mere sine mein ye dil hai ki dhaDakta bhi nahin

bhul ke sare sitam hum to chale jate 'zafar'

par hamein us ne kabhi dil se bulaya bhi nahin