اس سے ملا تو دل مرا سرشار ہو گیا

اس سے ملا تو دل مرا سرشار ہو گیا

اور پھر بچھڑ کے خود سے ہی بیزار ہو گیا

کوڑی کے بھاؤ بکتا ہے اس دور میں ضمیر

انسان کا وجود ہی بازار ہو گیا

رشتے ہوس کی آگ میں ایسے جلے کے بس

اب تو یقین اپنوں پہ دشوار ہو گیا

حرص و ہوس کی آگ تھی ہر سو جلی ہوئی

لیکن ضمیر میرا مددگار ہو گیا

پتھر کی چوٹ سہہ گیا کچھ بھی ہوا نہیں

لفظوں کا تیر دل کے مرے پار ہو گیا

آنکھوں سے تیری یاد کا ساون برس پڑا

سپنا مری حیات کا ساکار ہو گیا