اس سے مرے غموں کا مداوا نہیں ہوا

اس سے مرے غموں کا مداوا نہیں ہوا

میرے لیے وہ شخص مسیحا نہیں ہوا

ہوں گے بہت حسین زمانہ میں کیا کروں

یہ دل کسی کے حسن پہ شیدا نہیں ہوا

سمجھے گا کیسے وہ بھلا پھر دل کی بات کو

جس کا کسی کے دل میں ٹھہرنا نہیں ہوا

کرتے ہیں آسماں پہ وہ پرواز اس طرح

جیسے کبھی زمیں پہ اترنا نہیں ہوا

رکھا ہے دوستی کا بھرم دوستوں نے خوب

تنہا بھی ہو کے میں کبھی تنہا نہیں ہوا

تازہ رہے نہ زخم بھلا کیوں اے دوستو

دشمن کا ہو گیا ہے وہ میرا نہیں ہوا

پہلو میں ان کو دیکھا تو شمشادؔ بارہا

خود کی دعا پہ ہم کو بھروسہ نہیں ہوا