us se phir kya gila kare koi

us se phir kyā gilā kare koī

jo kahe sun ke kyā kare koī

ham bhī kyā kyā kaheñ ḳhudā jaane

gar hamārī sunā kare koī

haa.e vo bāteñ pyaar kī shab-e-vasl

bhūle kyā yaad kyā kare koī

log kyuuñ pūchhte haiñ haal mirā

zikr kis baat kā kare koī

dard-e-dil kā ilaaj ho kis se

yuuñ masīhā huā kare koī

bevafā gar kahūñ to kahte haiñ

kyā har ik se vafā kare koī

jaa.e gar jaañ to sau haiñ tadbīreñ

jaa.e gar dil to kyā kare koī

koī apnī ḳhatā to ho ma.alūm

uzr kis baat kā kare koī

dil kā kuchh haal hī nahīñ khultā

gar maraz ho davā kare koī

kabhī maiñ ne bhī kuchh kahā tum se

na suno, kuchh kahā kare koī

tum se be-rahm par na dil aa.e

aur aa.e to kyā kare koī

saikḌoñ bāteñ kah ke kahte haiñ

phir hameñ kyuuñ ḳhafā kare koī

koī kab tak na de javāb tumheñ

chupkā kab tak sunā kare koī

shikva us but kā har kisī se 'nizām'

us se kah de ḳhudā kare koī

us se phir kya gila kare koi

jo kahe sun ke kya kare koi

hum bhi kya kya kahen KHuda jaane

gar hamari suna kare koi

hae wo baaten pyar ki shab-e-wasl

bhule kya yaad kya kare koi

log kyun puchhte hain haal mera

zikr kis baat ka kare koi

dard-e-dil ka ilaj ho kis se

yun masiha hua kare koi

bewafa gar kahun to kahte hain

kya har ek se wafa kare koi

jae gar jaan to sau hain tadbiren

jae gar dil to kya kare koi

koi apni KHata to ho malum

uzr kis baat ka kare koi

dil ka kuchh haal hi nahin khulta

gar maraz ho dawa kare koi

kabhi main ne bhi kuchh kaha tum se

na suno, kuchh kaha kare koi

tum se be-rahm par na dil aae

aur aae to kya kare koi

saikDon baaten kah ke kahte hain

phir hamein kyun KHafa kare koi

koi kab tak na de jawab tumhein

chupka kab tak suna kare koi

shikwa us but ka har kisi se 'nizam'

us se kah de KHuda kare koi