us shoKH ka humne jo kabhi nam liya hai

us shoḳh kā ham ne jo kabhī naam liyā hai

vo huuk uThī hai ki jigar thaam liyā hai

lahrāte hue sham.a ke sho.ale kī zabāñ se

parvānoñ ne jal jaane kā paiġhām liyā hai

mahfil se tirī jab kiyā uThne kā irāda

nazroñ ne tirī dāman-e-dil thaam liyā hai

ab dekhiye is shauq kā anjām bhī kyā ho

saaqī se chhalaktā huā ik jaam liyā hai

bichhḌe hue rindān-e-balā-nosh ke ġham meñ

ashk āñkhoñ meñ bhar aa.e haiñ jab jaam liyā hai

be-vaj.h nahīñ aaj ye āñkhoñ meñ namī sī

ashkoñ se 'riyāz' aap ne kuchh kaam liyā hai

us shoKH ka hum ne jo kabhi nam liya hai

wo huk uThi hai ki jigar tham liya hai

lahraate hue shama ke shoale ki zaban se

parwanon ne jal jaane ka paigham liya hai

mahfil se teri jab kiya uThne ka irada

nazron ne teri daman-e-dil tham liya hai

ab dekhiye is shauq ka anjam bhi kya ho

saqi se chhalakta hua ek jam liya hai

bichhDe hue rindan-e-bala-nosh ke gham mein

ashk aankhon mein bhar aae hain jab jam liya hai

be-wajh nahin aaj ye aankhon mein nami si

ashkon se 'riyaz' aap ne kuchh kaam liya hai