us shoKH ke latif ishaaron ko dekhiye

us shoḳh ke latīf ishāroñ ko dekhiye

bikhre hue hasīn nazāroñ ko dekhiye

har ek shai meñ us kā hī jalva hai rū-ba-rū

ye ek dekhiye ki hazāroñ ko dekhiye

nazroñ meñ gar samāyā hai us yaar kā jamāl

dar dar galī galī meñ nigāroñ ko dekhiye

ye kis ke rañg-o-rūp kā aks-e-jamīl hai

chhā.ī huī chaman meñ bahāroñ ko dekhiye

nairañgī-e-hayāt hai har samt jalva-gar

tūfāñ ko dekhiye ki kināroñ ko dekhiye

parde uThā ke aaj shabistān-e-aish ke

haañ ik nigāh dard ke māroñ ko dekhiye

ulfat meñ terī haar chuke haiñ jo jān-o-dil

apne kabhī to sīna-fagāroñ ko dekhiye

kyoñ umr-e-muḳhtasar ko kareñ vaqf-e-ranj-o-ġham

dam bhar to zindagī kī bahāroñ ko dekhiye

dam bhar kahīñ thameñ na ye roke kahīñ rukeñ

is qulzum-e-hayāt ke dhāroñ ko dekhiye

sair-e-chaman na yaar na mutrib na shaġhl-e-mai

kyā dekh kar 'habīb' bahāroñ ko dekhiye

us shoKH ke latif ishaaron ko dekhiye

bikhre hue hasin nazaron ko dekhiye

har ek shai mein us ka hi jalwa hai ru-ba-ru

ye ek dekhiye ki hazaron ko dekhiye

nazron mein gar samaya hai us yar ka jamal

dar dar gali gali mein nigaron ko dekhiye

ye kis ke rang-o-rup ka aks-e-jamil hai

chhai hui chaman mein bahaaron ko dekhiye

nairangi-e-hayat hai har samt jalwa-gar

tufan ko dekhiye ki kinaron ko dekhiye

parde uTha ke aaj shabistan-e-aish ke

han ek nigah dard ke maron ko dekhiye

ulfat mein teri haar chuke hain jo jaan-o-dil

apne kabhi to sina-fagaron ko dekhiye

kyon umr-e-muKHtasar ko karen waqf-e-ranj-o-gham

dam bhar to zindagi ki bahaaron ko dekhiye

dam bhar kahin thamen na ye roke kahin ruken

is qulzum-e-hayat ke dhaaron ko dekhiye

sair-e-chaman na yar na mutrib na shaghl-e-mai

kya dekh kar 'habib' bahaaron ko dekhiye