us sine ki waqat hi kya hai jis sine mein tera nur nahin

us siine kī vaq.at hī kyā hai jis siine meñ terā nuur nahīñ

us kāsa-e-sar kī kyā qīmat jo sang-e-junūñ se chuur nahīñ

us dil ko koī kyuuñ dil maane jo jazb-o-junūñ se ḳhālī ho

us sham.a ko ham kyuuñ sham.a kaheñ jo partav-e-shama-e-tūr nahīñ

ye kaif-o-nashāt afzā rāteñ ye aish-o-tarab kī sauġhāteñ

jis shai ke evaz meñ miltī haiñ us shai kā ziyāñ manzūr nahīñ

murda bhī nahīñ ye zinda hai mālik bhī nahīñ ye banda hai

insān nirālī ḳhilqat hai muḳhtār nahīñ majbūr nahīñ

insān kī azmat us pe fidā ik banda-e-ḳhākī vo bhī thā

jo arsh-e-ilāhī chhū aayā phir bhī vo zarā maġhrūr nahīñ

us jān-e-jahāñ kī ḳhushnūdī matlūb-e-junūñ maqsūd-e-safar

socho to ye manzil duur bhī hai socho to ye manzil duur nahīñ

ho shauq-e-safar to rāh-e-safar har samt khulī hai tere liye

dil terā talab se ḳhālī hai tū varna yahāñ ma.azūr nahīñ

ham par vo ‘urūj’-e-ḳhasta-jigar talvār uThāte haiñ lekin

us vaar se taskīñ kyā hogī jo vaar abhī bharpūr nahīñ

us sine ki waqat hi kya hai jis sine mein tera nur nahin

us kasa-e-sar ki kya qimat jo sang-e-junun se chur nahin

us dil ko koi kyun dil mane jo jazb-o-junun se KHali ho

us shama ko hum kyun shama kahen jo partaw-e-shama-e-tur nahin

ye kaif-o-nashat afza raaten ye aish-o-tarab ki saughaten

jis shai ke ewaz mein milti hain us shai ka ziyan manzur nahin

murda bhi nahin ye zinda hai malik bhi nahin ye banda hai

insan nirali KHilqat hai muKHtar nahin majbur nahin

insan ki azmat us pe fida ek banda-e-KHaki wo bhi tha

jo arsh-e-ilahi chhu aaya phir bhi wo zara maghrur nahin

us jaan-e-jahan ki KHushnudi matlub-e-junun maqsud-e-safar

socho to ye manzil dur bhi hai socho to ye manzil dur nahin

ho shauq-e-safar to rah-e-safar har samt khuli hai tere liye

dil tera talab se KHali hai tu warna yahan mazur nahin

hum par wo ‘uruj’-e-KHasta-jigar talwar uThate hain lekin

us war se taskin kya hogi jo war abhi bharpur nahin