اس ستم گر سے آشنائی کی

اس ستم گر سے آشنائی کی

عمر بھر جس نے بے وفائی کی

ہنستے ہنستے ہی توڑنا دل کا

اک ادا ہے یہ دل ربائی کی

میں کہ خاموش عشق کا طالب

ان کو عادت ہے خود نمائی کی

درد و غم اور کرب کا عالم

ہائے کیا رات تھی جدائی کی

ان کا دیدار گرچہ مشکل تھا

جرأت شوق نے رسائی کی

نہ چلا گرد کارواں تک میں

انتہا ہے شکستہ پائی کی

جب اسیری میں قرب ہو ان کا

کون خواہش کرے رہائی کی

رنج و غم میں بھی مطمئن رکھنا

یہ تو ہے شان کبریائی کی

غم کی تاریک وادیوں میں عظیمؔ

دل کے زخموں نے رہنمائی کی