us sitamgar se aashnai ki

us sitamgar se āshnā.ī kī

umr bhar jis ne bevafā.ī kī

hañste hañste hī toḌnā dil kā

ik adā hai ye dilrubā.ī kī

maiñ ki ḳhāmosh ishq kā tālib

un ko aadat hai ḳhud-numā.ī kī

dard-o-ġham aur karb kā aalam

haa.e kyā raat thī judā.ī kī

un kā dīdār garche mushkil thā

jur.at-e-shauq ne rasā.ī kī

na chalā gard-e-kārvāñ tak maiñ

intihā hai shikasta-pā.ī kī

jab asīrī meñ qurb ho un kā

kaun ḳhvāhish kare rihā.ī kī

ranj-o-ġham meñ bhī mutma.in rakhnā

ye to hai shaan kibriyā.ī kī

ġham kī tārīk vādiyoñ meñ 'azīm'

dil ke zaḳhmoñ ne rahnumā.ī kī

us sitamgar se aashnai ki

umr bhar jis ne bewafai ki

hanste hanste hi toDna dil ka

ek ada hai ye dilrubai ki

main ki KHamosh ishq ka talib

un ko aadat hai KHud-numai ki

dard-o-gham aur karb ka aalam

hae kya raat thi judai ki

un ka didar garche mushkil tha

jurat-e-shauq ne rasai ki

na chala gard-e-karwan tak main

intiha hai shikasta-pai ki

jab asiri mein qurb ho un ka

kaun KHwahish kare rihai ki

ranj-o-gham mein bhi mutmain rakhna

ye to hai shan kibriyai ki

gham ki tarik wadiyon mein 'azim'

dil ke zaKHmon ne rahnumai ki