use bhula ke bhi yaadon ke silsile na gae

use bhulā ke bhī yādoñ ke silsile na ga.e

dil-e-tabāh tire us se rābte na ga.e

kitāb-e-zīst ke unvāñ badal ga.e lekin

nisāb-e-jāñ se kabhī us ke tazkire na ga.e

mujhe to apnī hī sāda-dilī ne luuTā hai

ki mere dil se muravvat ke hausle na ga.e

maiñ chāñd aur sitāroñ ke giit gaatā rahā

mire hī ghar se añdheroñ ke qāfile na ga.e

'ra.īs' jur.at-e-iz.hār merā virsa hai

qasīde mujh se kisī shaah ke likhe na ga.e

use bhula ke bhi yaadon ke silsile na gae

dil-e-tabah tere us se rabte na gae

kitab-e-zist ke unwan badal gae lekin

nisab-e-jaan se kabhi us ke tazkire na gae

mujhe to apni hi sada-dili ne luTa hai

ki mere dil se murawwat ke hausle na gae

main chand aur sitaron ke git gata raha

mere hi ghar se andheron ke qafile na gae

'rais' jurat-e-izhaar mera wirsa hai

qaside mujh se kisi shah ke likhe na gae