use is waqt is mahfil mein hona chahiye tha KHair

use is vaqt is mahfil meñ honā chāhiye thā ḳhair

mohabbat meñ anā ko dil se khonā chāhiye thā ḳhair

na.e rishte banāne the agar shikva bhulā kar sab

to dāman par lagā vo daaġh dhonā chāhiye thā ḳhair

paḌhā thā us kī āñkhoñ meñ adhūrā ek misra' jab

use likh kar ġhazal kā biij bonā chāhiye thā ḳhair

pata thā tum ko mere paas khone ko nahīñ hai kuchh

mujhe kho dene kā Dar tum ko honā chāhiye thā ḳhair

mire qissoñ meñ sun kar naam us kā log hañste the

use is baat par thoḌā to ronā chāhiye thā ḳhair

bichhaḌte vaqt us kī aañkh meñ kuchh bhī nahīñ dekhā

use do pal to palkoñ ko bhigonā chāhiye thā ḳhair

agar sapnoñ meñ karnā thā haqīqat ko bayāñ to phir

use is ke liye thoḌā to sonā chāhiye thā ḳhair

maiñ apne 'ishq meñ Duubī thī mujh ko 'ilm hī kab thā

use to bas mohabbat kā khilaunā chāhiye thā ḳhair

mire dil kī tasallī ke liye tasvīr bhejī hai

tumheñ is vaqt mere paas honā chāhiye thā ḳhair

use is waqt is mahfil mein hona chahiye tha KHair

mohabbat mein ana ko dil se khona chahiye tha KHair

nae rishte banane the agar shikwa bhula kar sab

to daman par laga wo dagh dhona chahiye tha KHair

paDha tha us ki aankhon mein adhura ek misra' jab

use likh kar ghazal ka bij bona chahiye tha KHair

pata tha tum ko mere pas khone ko nahin hai kuchh

mujhe kho dene ka Dar tum ko hona chahiye tha KHair

mere qisson mein sun kar nam us ka log hanste the

use is baat par thoDa to rona chahiye tha KHair

bichhaDte waqt us ki aankh mein kuchh bhi nahin dekha

use do pal to palkon ko bhigona chahiye tha KHair

agar sapnon mein karna tha haqiqat ko bayan to phir

use is ke liye thoDa to sona chahiye tha KHair

main apne 'ishq mein Dubi thi mujh ko 'ilm hi kab tha

use to bas mohabbat ka khilauna chahiye tha KHair

mere dil ki tasalli ke liye taswir bheji hai

tumhein is waqt mere pas hona chahiye tha KHair