use mai pila ke ye kah diya tere samne mere samne

use mai pilā ke ye kah diyā tire sāmne mire sāmne

hai hazār miil kā fāsla tire sāmne mire sāmne

vahī 'ishq hai vahī zaat hai vahī raat hai vahī baat hai

shab-o-roz kā vahī aa.ina tire sāmne mire sāmne

mirī ḳhvāhisheñ sabhī mar ga.iiñ mire ḳhvāb saare hī bujh ga.e

dil-e-nā-murād ne phir kahā tire sāmne mire sāmne

ka.ī sānahe hue raat bhar vo lahū kī holī thī chār-sū

vahī aah bhartī huī fazā tire sāmne mire sāmne

vahī soch hai vahī ḳhvāb hai vahī naam hai vahī ruup hai

vahī gard gard hai aa.ina tire sāmne mire sāmne

ka.ī zindagī kī udāsiyāñ ka.ī tohmateñ haiñ lagī huī

ye batā batā ki vo thak gayā tire sāmne mire sāmne

vo simaT ga.ī ki bikhar ga.ī mire e'tibār kī raushnī

dil-e-ashk-bār ne ye kahā tire sāmne mire sāmne

use mai pila ke ye kah diya tere samne mere samne

hai hazar mil ka fasla tere samne mere samne

wahi 'ishq hai wahi zat hai wahi raat hai wahi baat hai

shab-o-roz ka wahi aaina tere samne mere samne

meri KHwahishen sabhi mar gain mere KHwab sare hi bujh gae

dil-e-na-murad ne phir kaha tere samne mere samne

kai sanahe hue raat bhar wo lahu ki holi thi chaar-su

wahi aah bharti hui faza tere samne mere samne

wahi soch hai wahi KHwab hai wahi nam hai wahi rup hai

wahi gard gard hai aaina tere samne mere samne

kai zindagi ki udasiyan kai tohmaten hain lagi hui

ye bata bata ki wo thak gaya tere samne mere samne

wo simaT gai ki bikhar gai mere e'tibar ki raushni

dil-e-ashk-bar ne ye kaha tere samne mere samne