use panw jamane ko kinara mil gaya hai

use paañv jamāne ko kināra mil gayā hai

banegā dost ab dushman ishāra mil gayā hai

bahut ro.e haiñ maañ beTe kisī ko yaad kar ke

bahal jā.egā beTe ko ġhubāra mil gayā hai

sahelī saath chalte haiñ chal us kī chhāñv meñ ham

ġhazab kī dhuup meñ ik abr-pāra mil gayā hai

vo merā ḳhud-nigar nārāz ho kar jaane vaalā

palaT aayā to maiñ samjhī dobāra mil gayā hai

safar kī samt kā maiñ ḳhud ta.ayyun kar chukī thī

na jaane tum ye kyuuñ samjhe sitāra mil gayā hai

huī pal bhar meñ ḳhākistar ta.alluq kī imārat

bhare bārūd ko jaise sharāra mil gayā hai

haiñ us ke sar-varaq pur-ḳhār phūloñ se ziyāda

hameñ aglī mohabbat kā shumāra mil gayā hai

chhupā kar zikr karnā thā mirā sheroñ meñ us ne

so us ko jal-parī kā isti.āra mil gayā hai

use panw jamane ko kinara mil gaya hai

banega dost ab dushman ishaara mil gaya hai

bahut roe hain man beTe kisi ko yaad kar ke

bahal jaega beTe ko ghubara mil gaya hai

saheli sath chalte hain chal us ki chhanw mein hum

ghazab ki dhup mein ek abr-para mil gaya hai

wo mera KHud-nigar naraaz ho kar jaane wala

palaT aaya to main samjhi dobara mil gaya hai

safar ki samt ka main KHud tayyun kar chuki thi

na jaane tum ye kyun samjhe sitara mil gaya hai

hui pal bhar mein KHakistar talluq ki imarat

bhare barud ko jaise sharara mil gaya hai

hain us ke sar-waraq pur-KHar phulon se ziyaada

hamein agli mohabbat ka shumara mil gaya hai

chhupa kar zikr karna tha mera sheron mein us ne

so us ko jal-pari ka istiara mil gaya hai