use shauq-e-ghota-zani na tha wo kahan gaya

use shauq-e-ġhota-zanī na thā vo kahāñ gayā

mire najm-e-āb mujhe batā vo kahāñ gayā

jo lakīr paanī pe naqsh thī vo kidhar ga.ī

jo banā thā ḳhaak pe zā.icha vo kahāñ gayā

kahāñ TuuTe merī tanāb-e-jism ke hausle

jo lagā thā ḳhema vajūd kā vo kahāñ gayā

jo zamīn paañv tale bichhī thī kidhar ga.ī

vo jo āsmān saroñ pe thā vo kahāñ gayā

ga.e kis jihat ko tikon ḳhvāb ke zāviye

jo rukā thā aañkh meñ dā.era vo kahāñ gayā

abhī aks us kā ubhar rahā thā ki daf.atan

mire aa.ine se bichhaḌ gayā vo kahāñ gayā

use shauq-e-ghota-zani na tha wo kahan gaya

mere najm-e-ab mujhe bata wo kahan gaya

jo lakir pani pe naqsh thi wo kidhar gai

jo bana tha KHak pe zaicha wo kahan gaya

kahan TuTe meri tanab-e-jism ke hausle

jo laga tha KHema wajud ka wo kahan gaya

jo zamin panw tale bichhi thi kidhar gai

wo jo aasman saron pe tha wo kahan gaya

gae kis jihat ko tikon KHwab ke zawiye

jo ruka tha aankh mein daera wo kahan gaya

abhi aks us ka ubhar raha tha ki dafatan

mere aaine se bichhaD gaya wo kahan gaya