use yaadon mein jab lana musalsal kar diya maine

use yādoñ meñ jab laanā musalsal kar diyā maiñ ne

use vo hichkiyāñ aa.iiñ ki pāgal kar diyā maiñ ne

kitāboñ meñ paḌhe jab ek-tarfa pyaar ke qisse

ḳhud apnā dil tamannāoñ kā maqtal kar diyā maiñ ne

ka.ī ġhazleñ paḌī thiiñ nā-mukammal ek arse se

use jab aaj dekhā to mukammal kar diyā maiñ ne

jo saaya ham-qadam ban kar safar meñ saath rahtā thā

hamesha ke liye ḳhud se alag kal kar diyā maiñ ne

sunā to ḳhair se aayā huuñ us ko dāstāñ apnī

magar un phuul sī āñkhoñ ko bojhal kar diyā maiñ ne

tumhāre baal maiñ ne khol kar mausam badal Daalā

fazā meñ duur tak bādal hī bādal kar diyā maiñ ne

dhuāñ yādoñ kā hī kaafī thā dil kamzor karne ko

jalā kar raakh kal biiḌī kā banDal kar diyā maiñ ne

use yaadon mein jab lana musalsal kar diya main ne

use wo hichkiyan aain ki pagal kar diya main ne

kitabon mein paDhe jab ek-tarfa pyar ke qisse

KHud apna dil tamannaon ka maqtal kar diya main ne

kai ghazlen paDi thin na-mukammal ek arse se

use jab aaj dekha to mukammal kar diya main ne

jo saya ham-qadam ban kar safar mein sath rahta tha

hamesha ke liye KHud se alag kal kar diya main ne

suna to KHair se aaya hun us ko dastan apni

magar un phul si aankhon ko bojhal kar diya main ne

tumhaare baal main ne khol kar mausam badal Dala

faza mein dur tak baadal hi baadal kar diya main ne

dhuan yaadon ka hi kafi tha dil kamzor karne ko

jala kar rakh kal biDi ka banDal kar diya main ne