use ye wahm wo shatir baDa hai

use ye vahm vo shātir baḌā hai

abhī ham se kahāñ paalā paḌā hai

vo ḳhud ḳhāmosh hī kab ho rahā thā

tamāñcha vaqt ne muñh par jaḌā hai

dalīleñ dete dete thak chukā maiñ

vo jāhil apnī hī zid par aḌā hai

idhar kuchh ahl-e-haq sīna-sipar haiñ

udhar bātil kā ik lashkar khaḌā hai

tirī tāzīm aur kaise karūñ maiñ

tire qadmoñ meñ merā sar paḌā hai

maiñ kaise chhoḌ duuñ ab haath us kā

mirī ḳhātir vo duniyā se laḌā hai

ḳhudā.ī kā jise da.avā thā kal tak

vo apnī qabr meñ auñdhā paḌā hai

use kyoñ aa.ina dikhlā rahe ho

vo be-ġhairat baḌā chiknā ghaḌā hai

lahū ristā hai mere dil meñ ab tak

tumhārī yaad kā ḳhanjar gaḌā hai

use ye wahm wo shatir baDa hai

abhi hum se kahan pala paDa hai

wo KHud KHamosh hi kab ho raha tha

tamancha waqt ne munh par jaDa hai

dalilen dete dete thak chuka main

wo jahil apni hi zid par aDa hai

idhar kuchh ahl-e-haq sina-sipar hain

udhar baatil ka ek lashkar khaDa hai

teri tazim aur kaise karun main

tere qadmon mein mera sar paDa hai

main kaise chhoD dun ab hath us ka

meri KHatir wo duniya se laDa hai

KHudai ka jise dawa tha kal tak

wo apni qabr mein aundha paDa hai

use kyon aaina dikhla rahe ho

wo be-ghairat baDa chikna ghaDa hai

lahu rista hai mere dil mein ab tak

tumhaari yaad ka KHanjar gaDa hai