usi chiz ki koi izzat nahin

usī chiiz kī koī izzat nahīñ

zamāne ko jis kī zarūrat nahīñ

sadāqat se jis ko mohabbat nahīñ

ḳhudā kī qasam us ko rāhat nahīñ

hamīñ se hai jitnī mohabbat hameñ

kisī se bhī utnī mohabbat nahīñ

ġhulāmī hī ne.amat ho jin ke liye

tijārat meñ un ko masarrat nahīñ

na.ī kaun sī chiiz duniyā meñ hai

ye kahiye ki ab vo jahālat nahīñ

vo duniyā ke jhagḌe baḌhā.egā kyā

jise zikr-e-ḳhāliq se fursat nahīñ

ye maanā ki hai dushman-e-bad ajal

magar is se bachne kī sūrat nahīñ

jo pahle the ab bhī vahī haiñ mire

hamārī zabāñ hī meñ lazzat nahīñ

ḳhudā kī zarūrat hai 'saifī' hameñ

ḳhudā ko hamārī zarūrat nahīñ

usi chiz ki koi izzat nahin

zamane ko jis ki zarurat nahin

sadaqat se jis ko mohabbat nahin

KHuda ki qasam us ko rahat nahin

hamin se hai jitni mohabbat hamein

kisi se bhi utni mohabbat nahin

ghulami hi neamat ho jin ke liye

tijarat mein un ko masarrat nahin

nai kaun si chiz duniya mein hai

ye kahiye ki ab wo jahaalat nahin

wo duniya ke jhagDe baDhaega kya

jise zikr-e-KHaliq se fursat nahin

ye mana ki hai dushman-e-bad ajal

magar is se bachne ki surat nahin

jo pahle the ab bhi wahi hain mere

hamari zaban hi mein lazzat nahin

KHuda ki zarurat hai 'saifi' hamein

KHuda ko hamari zarurat nahin