اسی کے نام سے ہر کام کا آغاز کرتا ہوں

اسی کے نام سے ہر کام کا آغاز کرتا ہوں

جبیں ہے خاک پر سو عرش تک پرواز کرتا ہوں

مرے دشمن بھی میری اس ادا پر داد دیتے ہیں

میں اس انداز سے ان کو نظر انداز کرتا ہوں

مجھے اک راز سے پردہ اٹھانا جب بھی ہوتا ہے

کسی کو رازداری سے شریک راز کرتا ہوں

ترے ہی نام سے ملتی ہے وسعت دل کی دنیا کو

میں لمحہ لمحہ تیرا ذکر بے آواز کرتا ہوں

یہ اردو بھائی چارہ کی علمبردار ہے کاشفؔ

زباں پر اپنی میں کچھ اس لیے بھی ناز کرتا ہوں