usi ki zat ko hai daiman sabaat-o-qayam

usī kī zaat ko hai dāi.man sabāt-o-qayām

qādīr o hai o karīm o muhaimin o minām

burūj bārah meñ lā kar rakhī vo bārīkī

ki jis ko pahuñche na fikrat na dānish o auhām

idhar farishta-e-karrobī aur udhar ġhilmāñ

qalam ko lauh pe baḳhshī hai tāqat-e-irqām

ye do haiñ shams o qamar aur saath un ke yaar

atārad o zuhal o zohra mushtarī bahrām

jo chāheñ ek palak Thahreñ ye so tāqat kyā

phirā kareñge ye āġhāz se le tā-anjām

bashar jo chāhe ki samjhe unheñ so kyā imkāñ

hai yaañ farishtoñ kī aajiz aquul aur ifhām

nikāle un se gul o meva shāḳh o barg-o-bār

sab us ke lutf-o-karam ke haiñ aam ye in.aam

isī ke baaġh se dil shaad ho ke khāte haiñ

chhuhāre kishmish o injīr o pista o bādām

chamak rahā hai usī kī ye qudratoñ kā nuur

bahr-zamāñ o bahr-sā.at o bahr-hañgām

ki us kā shukr kareñ shab se mā-ba-roz adā

itā.at us kī bajā lāveñ sub.h se tā-shām

'nazīr' nukta samajh mehr-o-fazl-e-ḳhāliq ko

isī ke fazl se donoñ jahāñ meñ hai ārām

usi ki zat ko hai daiman sabaat-o-qayam

qadir o hai o karim o muhaimin o minam

buruj barah mein la kar rakhi wo bariki

ki jis ko pahunche na fikrat na danish o auham

idhar farishta-e-karrobi aur udhar ghilman

qalam ko lauh pe baKHshi hai taqat-e-irqam

ye do hain shams o qamar aur sath un ke yar

atarad o zuhal o zohra mushtari bahram

jo chahen ek palak Thahren ye so taqat kya

phira karenge ye aaghaz se le ta-anjam

bashar jo chahe ki samjhe unhen so kya imkan

hai yan farishton ki aajiz aqul aur ifham

nikale un se gul o mewa shaKH o barg-o-bar

sab us ke lutf-o-karam ke hain aam ye inam

isi ke bagh se dil shad ho ke khate hain

chhuhaare kishmish o injir o pista o baadam

chamak raha hai usi ki ye qudraton ka nur

bahr-zaman o bahr-saat o bahr-hangam

ki us ka shukr karen shab se ma-ba-roz ada

itaat us ki baja lawen subh se ta-sham

'nazir' nukta samajh mehr-o-fazl-e-KHaliq ko

isi ke fazl se donon jahan mein hai aaram