usi sahra ke hum bhi hain jahan diwane jate hain

usī sahrā ke ham bhī haiñ jahāñ dīvāne jaate haiñ

haqīqat ke ta'āqub meñ jahāñ afsāne jaate haiñ

dar-o-dīvār vaale tum darūn-e-ḳhāna vaale ham

so tum masjid kī jānib jaao ham maiḳhāne jaate haiñ

unheñ ye fikr un ke shahr kī tausī' kaise ho

mujhe tashvīsh mere haath se vīrāne jaate haiñ

hamārā dasht kyā sarsabz hai āb-e-nadāmat se

ki saare ahl-e-shahr aksar vahīñ pachhtāne jaate haiñ

vo miTTī kā badan hai yā koī jaadū kī puḌiyā hai

usī lamhe nahīñ hotā jab us ko paane jaate haiñ

vahīñ shāyad koī aglī shanāsā.ī kī mahfil ho

to chal dete haiñ ham bhī jis taraf begāne jaate haiñ

añdherī raat thī bārish thī aur masjid kā darvāza

to dekhā 'farhat-ehsās' ek dam mastāne jaate haiñ

usi sahra ke hum bhi hain jahan diwane jate hain

haqiqat ke ta'aqub mein jahan afsane jate hain

dar-o-diwar wale tum darun-e-KHana wale hum

so tum masjid ki jaanib jao hum maiKHane jate hain

unhen ye fikr un ke shahr ki tausi' kaise ho

mujhe tashwish mere hath se virane jate hain

hamara dasht kya sarsabz hai aab-e-nadamat se

ki sare ahl-e-shahr aksar wahin pachhtane jate hain

wo miTTi ka badan hai ya koi jadu ki puDiya hai

usi lamhe nahin hota jab us ko pane jate hain

wahin shayad koi agli shanasai ki mahfil ho

to chal dete hain hum bhi jis taraf begane jate hain

andheri raat thi barish thi aur masjid ka darwaza

to dekha 'farhat-ehsas' ek dam mastane jate hain