uTh is hujum se ai bewafa alahida ho

uTh is hujūm se ai bevafā alāhida ho

mirā hisāb chukā de zarā alāhida ho

ye kārvāñ tujhe raste meñ chhoḌ jā.egā

tū apnā qāfila ban ḳhaak uḌā alāhida ho

ye bāġh-e-husn hamesha harā nahīñ rahtā

badalne vaalī hai āb-o-havā alāhida ho

hamārā jurm hai kaalā libās aur mātam

hamāre jurm kī shāyad sazā alāhida ho

ye log dost nahīñ haiñ faqat munāfiq haiñ

na in ko dāġh-e-mohabbat dikhā alāhida ho

tū ḳhāk-zād hai miTTī tirā Thikāna hai

utar ke taḳht se miTTī pe aa alāhida ho

yahāñ pe sabz rutoñ ko agar bachānā hai

alam kā surḳh pharerā banā alāhida ho

maiñ apne ġham kī bahāroñ meñ mast huuñ yā-rab

mujhe chaman se na vāpas bulā alāhida ho

mire karam haiñ jale aur tire karam chamke

hamārā donoñ kā shāyad ḳhudā alāhida ho

agar zamīn pe qabza huā to kyā ġham hai

mire ḳhayāl kā kuchh silsila alāhida ho

mujhe ġhazal kī tavālat pe zor denā paḌā

ki lutf aur nishāñ ranj kā alāhida ho

vo ḳhud qatār meñ baiThā rahā magar 'faisal'

mujhe ishāre se kahne lagā alāhida ho

uTh is hujum se ai bewafa alahida ho

mera hisab chuka de zara alahida ho

ye karwan tujhe raste mein chhoD jaega

tu apna qafila ban KHak uDa alahida ho

ye bagh-e-husn hamesha hara nahin rahta

badalne wali hai aab-o-hawa alahida ho

hamara jurm hai kala libas aur matam

hamare jurm ki shayad saza alahida ho

ye log dost nahin hain faqat munafiq hain

na in ko dagh-e-mohabbat dikha alahida ho

tu KHak-zad hai miTTi tera Thikana hai

utar ke taKHt se miTTi pe aa alahida ho

yahan pe sabz ruton ko agar bachana hai

alam ka surKH pharera bana alahida ho

main apne gham ki bahaaron mein mast hun ya-rab

mujhe chaman se na wapas bula alahida ho

mere karam hain jale aur tere karam chamke

hamara donon ka shayad KHuda alahida ho

agar zamin pe qabza hua to kya gham hai

mere KHayal ka kuchh silsila alahida ho

mujhe ghazal ki tawalat pe zor dena paDa

ki lutf aur nishan ranj ka alahida ho

wo KHud qatar mein baiTha raha magar 'faisal'

mujhe ishaare se kahne laga alahida ho