uTha ke bar-e-hiqarat hansi-KHushi maine

uThā ke bār-e-hiqārat hañsī-ḳhushī maiñ ne

nigāh-e-nāz kī nafrat bhī luuT lī maiñ ne

ḳhud apnī zaat se bhī kar ke dushmanī maiñ ne

nibāh dī ġham-e-furqat se dostī maiñ ne

taḌap ke pursish-e-ġham par vo aah kī maiñ ne

dil-e-tabāh kī tasvīr khīñch dī maiñ ne

sham-e-umīd kī gul kar ke raushnī maiñ ne

nashāt-e-ġham kī na.ī raah DhūñDh lī maiñ ne

ġhazab hai us ko ḳhabar tak na ho ki jis ke liye

taḌap-taḌap ke shab-e-ġham guzār dī maiñ ne

kisī ke soz-e-mohabbat kī aañch de de kar

ġham-e-hayāt kī rangat nikhār dī maiñ ne

mazā milā hai taḌapne kā jab se furqat meñ

tire karam kī tamanna bhī chhoḌ dī maiñ ne

tamāshā apnī tabāhī kā ḳhuub dekh liyā

nisār kar ke tire ġham pe har ḳhushī maiñ ne

fasāna-e-ġham-e-furqat na pūchhiye 'sāhir'

guzārnā thī shab-e-ġham guzār dī maiñ ne

uTha ke bar-e-hiqarat hansi-KHushi main ne

nigah-e-naz ki nafrat bhi luT li main ne

KHud apni zat se bhi kar ke dushmani main ne

nibah di gham-e-furqat se dosti main ne

taDap ke pursish-e-gham par wo aah ki main ne

dil-e-tabah ki taswir khinch di main ne

sham-e-umid ki gul kar ke raushni main ne

nashat-e-gham ki nai rah DhunDh li main ne

ghazab hai us ko KHabar tak na ho ki jis ke liye

taDap-taDap ke shab-e-gham guzar di main ne

kisi ke soz-e-mohabbat ki aanch de de kar

gham-e-hayat ki rangat nikhaar di main ne

maza mila hai taDapne ka jab se furqat mein

tere karam ki tamanna bhi chhoD di main ne

tamasha apni tabahi ka KHub dekh liya

nisar kar ke tere gham pe har KHushi main ne

fasana-e-gham-e-furqat na puchhiye 'sahir'

guzarna thi shab-e-gham guzar di main ne