uTha ke naz se daman bhala kidhar ko chale

uThā ke naaz se dāman bhalā kidhar ko chale

idhar to dekhiye bahr-e-ḳhudā kidhar ko chale

mirī nigāhoñ meñ donoñ jahāñ hue tārīk

ye aap khol ke zulf-e-dutā kidhar ko chale

abhī to aa.e ho jaldī kahāñ hai jaane kī

uTho na pahlū se Thahro zarā kidhar ko chale

ḳhafā ho kis pe bhañveñ kyuuñ chaḌhī haiñ ḳhair to hai

ye aap teġh pe dhar kar jilā kidhar ko chale

musāfirān-e-adam kuchh kaho azīzoñ se

abhī to baiThe the hai hai bhalā kidhar ko chale

chaḌhī haiñ tevriyāñ kuchh hai mizha bhī jumbish meñ

ḳhudā hī jaane ye teġh-e-adā kidhar ko chale

gayā jo maiñ kahīñ bhūle se un ke kūche meñ

to hañs ke kahne lage haiñ 'rasā' kidhar ko chale

uTha ke naz se daman bhala kidhar ko chale

idhar to dekhiye bahr-e-KHuda kidhar ko chale

meri nigahon mein donon jahan hue tarik

ye aap khol ke zulf-e-duta kidhar ko chale

abhi to aae ho jaldi kahan hai jaane ki

uTho na pahlu se Thahro zara kidhar ko chale

KHafa ho kis pe bhanwen kyun chaDhi hain KHair to hai

ye aap tegh pe dhar kar jila kidhar ko chale

musafiran-e-adam kuchh kaho azizon se

abhi to baiThe the hai hai bhala kidhar ko chale

chaDhi hain tewriyan kuchh hai mizha bhi jumbish mein

KHuda hi jaane ye tegh-e-ada kidhar ko chale

gaya jo main kahin bhule se un ke kuche mein

to hans ke kahne lage hain 'rasa' kidhar ko chale