uTha shoala sa qalb-e-na-tawan se

uThā sho.ala sā qalb-e-nā-tavāñ se

havā aa.ī kabhī jo shahr-e-jāñ se

hamārī samt bhī chashm-e-ināyat

tirī ḳhātir bane haiñ nīm-jāñ se

shikāyat us se hai jis par fidā huuñ

mujhe shikva nahīñ saare jahāñ se

nigāhoñ se adā karte ho matlab

kahāñ kahte ho kuchh apnī zabāñ se

tumhīñ the yā vo parchhā.īñ tumhārī

abhī bijlī sī jo guzrī yahāñ se

koī saanī nahīñ us kā jahāñ meñ

mujhe nisbat hai jis sarv-e-ravāñ se

musībat-āshnā yuuñ hī nahīñ maiñ

judā maiñ bhī huī huuñ kārvāñ se

udāsī kis liye phailī huī hai

uThā hai kaun āḳhir darmiyāñ se

idhar aa āshnā-e-rāz-e-fitrat

sadā aatī hai dasht-e-be-karāñ se

uTha shoala sa qalb-e-na-tawan se

hawa aai kabhi jo shahr-e-jaan se

hamari samt bhi chashm-e-inayat

teri KHatir bane hain nim-jaan se

shikayat us se hai jis par fida hun

mujhe shikwa nahin sare jahan se

nigahon se ada karte ho matlab

kahan kahte ho kuchh apni zaban se

tumhin the ya wo parchhain tumhaari

abhi bijli si jo guzri yahan se

koi sani nahin us ka jahan mein

mujhe nisbat hai jis sarw-e-rawan se

musibat-ashna yun hi nahin main

juda main bhi hui hun karwan se

udasi kis liye phaili hui hai

uTha hai kaun aaKHir darmiyan se

idhar aa aashna-e-raaz-e-fitrat

sada aati hai dasht-e-be-karan se