اٹھانے کو تو اٹھا رہا ہوں نہ اٹھے جو بار غم کسی سے

اٹھانے کو تو اٹھا رہا ہوں نہ اٹھے جو بار غم کسی سے

نزاکت دل کا ہے یہ عالم کہ چوٹ لگ جاتی ہے ہنسی سے

کوئی یہ سوچے وہ کیا کرے گا تباہیوں کا گلہ کسی سے

جو ان کے ہر ظلم ناروا کو عزیز رکھتا ہے زندگی سے

جو مجھ سے میرا سکون لے لے سکون لے کر عذاب دے دے

وہ آگہی کوئی آگہی ہے میں باز آیا اس آگہی سے

ہزار چاہے زمانہ لیکن یہ درد و آلام کے اندھیرے

اگر ہوئے دور تو یہ ہوں گے فقط محبت کی روشنی سے

کسی کی محفل سے اٹھ تو آئے مگر یہ ہے اپنا حال شارقؔ

کسی اندھیرے میں آ گئے ہوں گزر کے ہم جیسے روشنی سے