uThao sang ki hum mein sanak bahut hai abhi

uThāo sañg ki ham meñ sanak bahut hai abhī

hamāre garm lahū meñ namak bahut hai abhī

utar rahī hai agar chāñdnī utarne de

mahaktī zulf meñ terī chamak bahut hai abhī

ye kal kisī na.e mausam kī fasl kāTeñge

saroñ meñ ahl-e-junūñ ke Thanak bahut hai abhī

use ḳhabar nahīñ sūraj bhī Duub jaatā hai

hasīñ libās pe nāzāñ dhanak bahut hai abhī

hamāre pahle hī mausam ne ham ko toḌ diyā

magar tumhāre badan meñ lachak bahut hai abhī

havā-e-vaqt ne jhoñkī hai dhuul āñkhoñ meñ

hamārī aañkh meñ lekin chamak bahut hai abhī

dil apnā un kī hathelī pe rakh bhī de 'anjum'

tire ḳhulūs pe yāroñ ko shak bahut hai abhī

uThao sang ki hum mein sanak bahut hai abhi

hamare garm lahu mein namak bahut hai abhi

utar rahi hai agar chandni utarne de

mahakti zulf mein teri chamak bahut hai abhi

ye kal kisi nae mausam ki fasl kaTenge

saron mein ahl-e-junun ke Thanak bahut hai abhi

use KHabar nahin suraj bhi Dub jata hai

hasin libas pe nazan dhanak bahut hai abhi

hamare pahle hi mausam ne hum ko toD diya

magar tumhaare badan mein lachak bahut hai abhi

hawa-e-waqt ne jhonki hai dhul aankhon mein

hamari aankh mein lekin chamak bahut hai abhi

dil apna un ki hatheli pe rakh bhi de 'anjum'

tere KHulus pe yaron ko shak bahut hai abhi