uThegi un ke chehre se naqab aahista aahista

uThegī un ke chehre se naqāb āhista āhista

nazar aa jā.egā ye inqalāb āhista āhista

hamesha ishq meñ sabr-o-sukūñ se kaam chaltā hai

dil-e-nākām hogā kāmyāb āhista āhista

ye rusvā.ī to lāzim thī magar itnā kiyā maiñ ne

huā rusvā zamāne meñ shabāb āhista āhista

savāl un ke to aksar barq-raftārī se hote haiñ

nikaltā hai mire muñh se javāb āhista āhista

sunā de faisla jo kuchh bhī hai ai dāvar-e-mahshar

na kar mere gunāhoñ kā hisāb āhista āhista

tasallī un ke milne se bhī ab hotī nahīñ dil kī

yahāñ tak baḌh gayā hai iztirāb āhista āhista

ye piinā bhī hai kyā piinā ye baḳhshish bhī hai kyā baḳhshish

pilā.ī mujh ko saaqī ne sharāb āhista āhista

yahāñ tak guftugū meñ tez chaltī thī zabāñ un kī

ye kahnā hī paḌā mujh ko janāb āhista āhista

tunak-zarfoñ kī sohbat raas aatī tā-ba-kai us ko

jahāñ meñ ho ga.ī rusvā sharāb āhista āhista

pasand aa.ī hameñ ye baat 'sāhir' jab kahā us ne

vafādāroñ kā hogā intiḳhāb āhista āhista

uThegi un ke chehre se naqab aahista aahista

nazar aa jaega ye inqalab aahista aahista

hamesha ishq mein sabr-o-sukun se kaam chalta hai

dil-e-nakaam hoga kaamyab aahista aahista

ye ruswai to lazim thi magar itna kiya main ne

hua ruswa zamane mein shabab aahista aahista

sawal un ke to aksar barq-raftari se hote hain

nikalta hai mere munh se jawab aahista aahista

suna de faisla jo kuchh bhi hai ai dawar-e-mahshar

na kar mere gunahon ka hisab aahista aahista

tasalli un ke milne se bhi ab hoti nahin dil ki

yahan tak baDh gaya hai iztirab aahista aahista

ye pina bhi hai kya pina ye baKHshish bhi hai kya baKHshish

pilai mujh ko saqi ne sharab aahista aahista

yahan tak guftugu mein tez chalti thi zaban un ki

ye kahna hi paDa mujh ko janab aahista aahista

tunak-zarfon ki sohbat ras aati ta-ba-kai us ko

jahan mein ho gai ruswa sharab aahista aahista

pasand aai hamein ye baat 'sahir' jab kaha us ne

wafadaron ka hoga intiKHab aahista aahista