uThi hai dil mein ye kaisi tarang jaanti hun

uThī hai dil meñ ye kaisī tarang jāntī huuñ

kahāñ pe jā ke kaTegī patang jāntī huuñ

ye kis ke lutf-o-karam ne hai tishnagī baḳhshī

hai por por meñ kaisī umang jāntī huuñ

utar rahī hai mirī ruuh par ye kis kī dhanak

chaḌhā hai dil pe mire kis kā rang jāntī huuñ

ki jis kī dhun pe mirī shāḳh-e-jāñ dhamāl meñ hai

bajā hai dil meñ koī jal-tarang jāntī huuñ

ġhurūr-e-‘ishq ne baḳhshe haiñ mujh ko ye tevar

badal rahe haiñ mire rang Dhang jāntī huuñ

kahāñ kā sahl hai pindār kī nafī karnā

darūn-e-zāt jo hotī hai jang jāntī huuñ

badan pe phūñkā hai mantar kisī qalandar ne

rahegā raqs meñ ab ang ang jāntī huuñ

zamāne bhar se huī be-niyāz tere sabab

tire karam se huā dil malang jāntī huuñ

ḳhabar hai dar se tire ab ye dil na jā.egā

kahīñ bhī jā.ūñ karegā ye tang jāntī huuñ

ye rāste yuñhī āsāñ nahīñ hue 'nasrīñ'

vo chal rahā hai mire sang sang jāntī huuñ

uThi hai dil mein ye kaisi tarang jaanti hun

kahan pe ja ke kaTegi patang jaanti hun

ye kis ke lutf-o-karam ne hai tishnagi baKHshi

hai por por mein kaisi umang jaanti hun

utar rahi hai meri ruh par ye kis ki dhanak

chaDha hai dil pe mere kis ka rang jaanti hun

ki jis ki dhun pe meri shaKH-e-jaan dhamal mein hai

baja hai dil mein koi jal-tarang jaanti hun

ghurur-e-‘ishq ne baKHshe hain mujh ko ye tewar

badal rahe hain mere rang Dhang jaanti hun

kahan ka sahl hai pindar ki nafi karna

darun-e-zat jo hoti hai jang jaanti hun

badan pe phunka hai mantar kisi qalandar ne

rahega raqs mein ab ang ang jaanti hun

zamane bhar se hui be-niyaz tere sabab

tere karam se hua dil malang jaanti hun

KHabar hai dar se tere ab ye dil na jaega

kahin bhi jaun karega ye tang jaanti hun

ye raste yunhi aasan nahin hue 'nasrin'

wo chal raha hai mere sang sang jaanti hun