uThin aankhen agar aahaT suni hai

uThīñ āñkheñ agar aahaT sunī hai

sadā tasvīr banñā chāhtī hai

abhī guzrā nahīñ ruḳhsat kā lamha

vo saa.at aañkh meñ Thahrī huī hai

abhī lauTā nahīñ din kā musāfir

añdherā ho chukā khiḌkī khulī hai

abhī sar par hai tanhā.ī kā sūraj

mirī āñkhoñ meñ duniyā jāgtī hai

agar guzrā nahīñ vo is taraf se

ye hairat kis ne dīvāroñ ko dī hai

mire chehre kī raunaq ahd-e-māzī

ye surḳhī kal ke aḳhbāroñ se lī hai

bahut sharminda huuñ iblīs se maiñ

ḳhatā merī sazā us ko milī hai

bahā kar le gayā sailāb sab kuchh

faqat āñkhoñ kī vīrānī bachī hai

kahāñ tak bojh uThā.egī hamārā

ye dhartī bhī to būḌhī ho chukī hai

na aa.egī havā ko niiñd kyūñ-kar

zamānoñ kī thakī-hārī huī hai

bas ab bujhne ko hai sūraj kī qindīl

jahāñ tak jal sakī jaltī rahī hai

zabāneñ thak chukīñ patthar hue kaan

kahānī an-kahī thī an-kahī hai

makīñ 'shahzād' pyāse mar rahe haiñ

dar-o-dīvār par kaa.ī ugī hai

uThin aankhen agar aahaT suni hai

sada taswir banna chahti hai

abhi guzra nahin ruKHsat ka lamha

wo saat aankh mein Thahri hui hai

abhi lauTa nahin din ka musafir

andhera ho chuka khiDki khuli hai

abhi sar par hai tanhai ka suraj

meri aankhon mein duniya jagti hai

agar guzra nahin wo is taraf se

ye hairat kis ne diwaron ko di hai

mere chehre ki raunaq ahd-e-mazi

ye surKHi kal ke aKHbaron se li hai

bahut sharminda hun iblis se main

KHata meri saza us ko mili hai

baha kar le gaya sailab sab kuchh

faqat aankhon ki virani bachi hai

kahan tak bojh uThaegi hamara

ye dharti bhi to buDhi ho chuki hai

na aaegi hawa ko nind kyun-kar

zamanon ki thaki-haari hui hai

bas ab bujhne ko hai suraj ki qindil

jahan tak jal saki jalti rahi hai

zabanen thak chukin patthar hue kan

kahani an-kahi thi an-kahi hai

makin 'shahzad' pyase mar rahe hain

dar-o-diwar par kai ugi hai