uThiye to kahan jaiye jo kuchh hai yahin hai

uThiye to kahāñ jā.iye jo kuchh hai yahīñ hai

bāhar tire ghar ke to na duniyā hai na diiñ hai

ham haiñ ki sar-e-naqsh-e-qadam saikḌoñ sajde

vo hai ki jahāñ dekhiye bas chīñ-ba-jabīñ hai

sahrā meñ phirātī hai mujhe ḳhāna-ḳharābī

ye DhūñD rahā huuñ ki mirā ghar bhī yahīñ hai

aatī nahīñ nazdīk ḳhayāloñ ke ye duniyā

vo bazm bhī yā rab koī firdaus-e-barīñ hai

tā hadd-e-taḳhayyul faqat ik jalva hai yā dil

duniyā meñ hamārī na falak hai na zamīñ hai

jī bhar ke zarā dekh to leñ husn ke jalve

phir kis ko unheñ chhoḌ ke jiine kā yaqīñ hai

vo dard-e-darūñ jism meñ yuuñ phail gayā hai

paḌtā hai jahāñ haath samajhtā huuñ yahīñ hai

rahtā huuñ 'suhā' ahl-e-haram meñ bhī numāyāñ

hote haiñ ishāre ye ḳharābāt-nashīñ hai

uThiye to kahan jaiye jo kuchh hai yahin hai

bahar tere ghar ke to na duniya hai na din hai

hum hain ki sar-e-naqsh-e-qadam saikDon sajde

wo hai ki jahan dekhiye bas chin-ba-jabin hai

sahra mein phiraati hai mujhe KHana-KHarabi

ye DhunD raha hun ki mera ghar bhi yahin hai

aati nahin nazdik KHayalon ke ye duniya

wo bazm bhi ya rab koi firdaus-e-barin hai

ta hadd-e-taKHayyul faqat ek jalwa hai ya dil

duniya mein hamari na falak hai na zamin hai

ji bhar ke zara dekh to len husn ke jalwe

phir kis ko unhen chhoD ke jine ka yaqin hai

wo dard-e-darun jism mein yun phail gaya hai

paDta hai jahan hath samajhta hun yahin hai

rahta hun 'suha' ahl-e-haram mein bhi numayan

hote hain ishaare ye KHarabaat-nashin hai